Fitore minimale e Vëllaznimit, Trepça'89 kthehet e pamposhtur nga kryeqyteti

Sot janë zhvilluar ndeshjet e para gjysmëfinale të Kupës së Kosovës në futboll. Vëllaznimi ka shënuar fitore para tifozëve të vet ndaj Besës, me rezultat minimal, 1:0, me golin e shënuar nga Ismet Ramushi, në minutën e 3-të.
Megjithatë kjo fitore nuk i siguron kualifikimin skuadrës gjakovare, pasi ndeshjen e kthimit e zhvillon si mysafire në Pejë. Ndërkohë, në ndeshjen tjetër gjysmëfinale, Prishtina dhe Trepça'89 luajtën baras, 2:2. Skuadra mitrovicase u tregua mjaft e mirë në 45 minutat e parë, duke shënuar dy gola, nëpërmjet Osmanit (28') dhe Shkupollit (35'). Megjithatë në pjesëlojën e dytë mbizotëroi plotësisht skuadra e Prishtinës, e cila arriti që t'i barazojë shifrat me golat e shënuar nga Fetahu (48') dhe Ahmeti (75'). Rezultati i barabartë gjithsesi i konvenon skuadrës mitrovicase, e cila ndeshjen e kthimit do ta zhvillojë para tifozëve të vet, më 7 maj.